Beno nêbeno, waxtê waxtê de, jü phire bena,

               jü lüye bena,

               jü ki bizê de phire bena

               Daka phire her roz biza xo dosena,

               Sitê xo ana girênena, amên kena, kena binê jü lêy,

               ebe tenê kinca pisena têra.

               Daka phire rocê êna qayt kena ke sit cino.

               Roca bine êna qayt kena ke sit hawo onciya cino.

               Daka phire bêna xêge.

               Vana:

                -No nia nêbeno. Kamo sitê mi tireno ?

                Ez gereke bizani.

                Rocê daka phire sitê xo ana, rêyna pisena têra,

                kena binê lêy. Dariya xo cêna xo dest,

                xo pê cêver de dana we.

                Qayt kena ke cêver bi ya (ra),

                lüye bêveng amê kewte zerê bon,

                sîye lê kerd berz û dormê xode kayt kerd ke

                kes cîno, zaf kêf kerd,

                esqi ra nêzana ke se bikero.

                Lüye êna ke, site xo serde kero, bisimo.

                Daka phire pê cêverî ra vecîna, darîye

                Kena berz ke lüye bitersno, lüye remena.

                Docikê lüye têyna küno darîye ver, beno cira

                Lüye cêrena ra, êna lêwê daka phire,

                cêrena vera, vana:

                -Daka phire, daka phire, docikê mi bide mi,

                hêval û hogirê mi sî, ez têyna mendo.

                Docikê mi bide mi ke, ez xorê serî

                Hêval û hogirê xo resî.

                Daka phire vana:

                -So sitê mi biya ke ez docikê to bidî to, ti kî

                xorê serê hêvalanê xo resê.

                Lüye cê phire ra vecîna, teknena sona

                Lêwê biza kole.

                Biza kole rê vana:

                -Biza kole, biza kole sit bide mi, ez sit ben

                dan phire, phire docikê mi dana mi, ez xorê

                son reson hêval û hogirê xo.

                Biza kole vana:

- So mirê velg bîya.

               Lûye sona lêwê dare.

               Dare lûye rê vana:

               -Xêra? Ti ama lêwê mi, mira ci wazena?

               Lûye vana:

               -Darê, darê velg bide mi, velg ben dan

               biza kole, biza kole sit dana mi, sit ben

               dan phire, phire docikê mi dana mi, ez xorê

               son reson hêval û hogirê xo.

               Dare vana:

               -Lûya dêlale ez zaf têysano, mi agwe de,

               ez velg dan to.

               Lûye sona lêwê îni.

               Ini rê vana:

               -Ini, îni agwe bide mi, agwe ben dan

               dare, dare velg dana mi, velg bed dan

               biza kole, biza kole sit dana mi, sit ben

               dan phire, phire docikê mi dana mi, ez

               xorê son reson hêval û hogirê xo.

               Ini vano:

               -So cêna pasay bîya, wa mi sero

               bireqesîyo. A waxt ez agwe don to.

               Lûye sona lêwê cêna pasay.

               Cêna pasay rê vana:

               -Cêna pasay, cêna pasay, ez hêyranê to,

               ez qurbanê to, bê îni sero bireqesîye ke,

               îni agwe bido mi! Agwe ben dan dare,

               dare velg dana mi, velg ben dan biza kole

               biza kole sit dana mi, sit ben dan phire,

               phire docik^w mi dana mi, ez xorê son

               reson hêval û hogirê xo.

               Cêna pasay lûye rê vana:

               -So mirê posthala biya, ez ên îni sero

               reqesîn.

               Lûye sona lêwê goskar

               Cirê vana:

               -Goskar goskar, posthala bide mi.

               Posthala ben dan cêna pasay, cêna

               Pasay êna îni sero reqesîna, îni

               Agwe dano mi, agwe ben dan dare,

               dare velg dana mi, velg ben dan biza

               kole, biza kole sit dana mi, sit ben dan phire

               phire docikê mi dana mi, ez xorê son reson

               hêval û hogirê xo.

               Goskar vano:

               -Ez zaf vêsano, so mirê haka bîya ke,

               ez posthala bidî to.

              Lûye sona lêwê kerge.

              Kerge rê vana:

-Wae kerge wae kerge, haka bide mi.

              Haka ben dan goskar, goskar posthala

              Dano mi, posthala ben dan cêna pasay,

              cêna pasay êna, îni sero reqesîna,

              îni agwe dano mi,agwe ben dan dare,

              dare velg dana mi, velg ben dan biza kole

              biza kole sit dana mi, sit ben dan phire,

              phire docikê mi dana mi, ez xorê son

              reson hêval û hogirê xo.

              Kerge vana:

              -So mirê qut bîya ke, ez kî haka bidî to!

              Lûye sona lêwê gize.

              Gize rê vana:

              -Gizê gizê,qut bide mi, qut ben dan kerge.

              Kerge haka dana mi, haka ben dan

              Goskar, goskar posthala dano mi,

              posthala ben dan cêna pasay.

              Cêna pasay êna îni sero reqesîna,

              îni agwe dano mi,agwe ben dan dare,

              dare velg dana mi, velg ben dan biza kole,

              biza kole sit dana mi, sit ben dan phire,

              phire docikê mi dana mi,

              ez xorê son reson hêval û hogirê xo.

              Gize vana:

              Wae lûye, tenê rixe bîya qasnaxê mi,

              suax ke ke, ez qut bidî to.

              Lûye sona lêwê gay.

              Gay rê vana:

              -Gao rindek, gao rindek, tenê rixe bide mi.

              Ebe rixa to ez gize suax kon, gize qut dana mi,

              qut ben dan kerge, kerge haka dana mi,

              haka ben dan goskar, goskar posthala dano mi,

              posthala ben dan cêna pasay, cêna pasay êna îni

              sero reqesina, îni agwe dano mi, agwe bendan dare,

              dare velg dana mi, velg ben dan biza kole,

              biza kole sit dana mi, sit ben dan phire,

              phire docikê mi dana mi.

              ez xorê son reson hêval û hogirê xo.

              Ga vano:

              -So, sepetê simer bîya ara mi ke, ez simerî  borî,

              tenê rixe bikerî.

             Lûye sona lêwê mereke, mereke rê vana:

             -Mereke, mereke,sepetê simer bide mi.

             simer ben dan gay, ga rixe keno,

             ebe rixa gay gize suax kon, gize qut dana mi, 

             qut ben dan kerge, kerge haka dana mi,

             haka ben dan goskar, goskar posthala dano mi,

             posthala ben dan cêna pasay,

             cêna pasay êna îni sero reqesina,

             îni agwe dano mi, agwe ben dan dare,

             dare velg dana mi, velg ben dan biza kole,

             biza kole sit dana mi, sit ben dan phire,

             phire docikê mi dana mi,

             ez xorê son reson hêval û hogirê xo.

             Mereke vana:

             -Wae lûye, ez nî dilopo vera helak bîyo.

             Vecîye mi ser, tenê sere bone mi bidûasne,

             mi nî dilopo ra bixelesne. Ez sepetê simer

             dan to.

             Lûye loge cêna, vecîna serê mereke ,

             mereke loge kena,

             ebe ningane xûya rind dûesnena.

             Lûye ke kara xo qedênena, mereke simer dana lûye.

             Lûye simer bena dana gay.

             Ga rixe keno.

             Lûye ebe rixa gay gize suax kena.

             Gize qut dana lûye.

             Lûye qut bena dana kerge.

             Kerge haka dana lûye.

             Lûye haka bena dana goskar.

             Goskar posthala dano lûye.

             Lûye posthala bena dana cêna pasay.

             Cêna pasay êna îni sero reqesîna.

             Ini agwe dano lûye.

             Lûye agwe bena, dare agwe dana.

             Dare velg dana lûye.

             Lûye velgî bena dana biza kole.

             Biza kole sit dana lûye.

             Lûye sit bena dana daka phire.

             Daka phire docikê lûye dana lûye.

             Lûye docekê xo cena,sona resena hêval û hogirê xo.

             Lûye zaf kêf kena, resena miradê xo,

             sima kî biresê miradê xo...................